अमेरिकाको जोन्स हप्किन्स विश्वविद्यालय स्कूल अफ एडभान्स्ड इन्टरनेशनल स्टडिजमा समेत अध्ययन गरेका प्राध्यापक हुआङ झेङ डुओ चीन र दक्षिण एसियाली देशहरूबीचको सम्बन्धबारे अध्ययन अनुसन्धानकर्ताका रुपमा सक्रिय छन्।
प्राध्यापक हुआङ हाल चीनको सिचुआन विश्वविद्यालयको नेपाल अध्ययन केन्द्रका निर्देशक पनि हुन्। प्रा. हुआङका तीन पुस्तकहरू र दर्जनौँ अनुसन्धानात्मक लेखहरु प्रकाशित छन्।
चीन-नेपाल सम्बन्धको ७०औँ वर्षको अवसर पारेर भइरहेका विभिन्न कार्यक्रममा सहभागिता जनाउन उनी भदौ पहिलो साता काठमाडौँ आएका थिए। राष्ट्रिय समाचार समिति (रासस) ले प्रा.सँग कुराकानी गरेको थियो।
प्रस्तुत छ, प्राध्यापक हुआङसँगको कुराकानी:
नेपाल आइरहन तपाईंलाई के कुराले उत्प्रेरित गर्छ?
अहिलेसम्म लगभग २० पटकभन्दा बढी नेपाल आएको छु। यस हिसावले नेपाल मेरो दोस्रो घर होभन्दा पनि हुन्छ।
नेपाल आउँदा अध्ययन-अनुसन्धान गर्ने कामदेखि विभिन्न शैक्षिक गोष्ठी, सम्मेलन तथा कार्यक्रमहरुमा सहभागी भइरहेको हुन्छु। नेपालको प्राकृतिक सौन्दर्यले पनि मलाई पटकपटक तानिहरन्छ।
मैले नेपालका विभिन्न स्थानहरु घुमेको छु। काठमाडौँ बाहिर जनकपुर, चितवन, लुम्बिनी, पोखरा, मनाङ लगायताका ठाउँहरुमा पुगेको छु। सबैको आ-आफ्नै विशेषताहरु छन्।
तथापि लुम्बिनी मेरो मन पर्ने ठाउँमध्ये पर्दछ। यो भगवान् गौतम बुद्धको जन्मस्थल भएकाले पनि महत्वपूर्ण छ। बौद्ध धर्मसँगको चीनको नाता धेरै पुरानो हो। त्यहाँ गएर केही समय बिताउँदा मन शान्त हुन्छ।
पर्यटन क्षेत्रमा नेपालले के-कस्ता सुधार गर्नसक्यो भने चिनियाँ पर्यटकको आकर्षण बढाउन सकिएला?
नेपाल प्राकृतिक रुपमा सुन्दर त छँदैछ, त्यसबाहेक विश्वसम्पदा सूचीमा रहेका विभिन्न दरबार क्षेत्रहरु, विशवकै सर्वोच्च शिखर सगरमाथा, विभिन्न राष्ट्रिय निकुञ्जहरु, अनि यहाँको संस्कृति आफैँमा बेजोड छ।
भगवान् गौतम बुद्धको जन्मस्थल भएकाले लुम्विनी चिनियाँ नागरिकहरुको आकर्षणको केन्द्र बनेको छ। मैले घुमफिरका क्रममा देखेको लुम्बिनी भौतिक संरचनामा ठीकै छ तर त्यहाँको सांस्कृतिक भावना आदानप्रदान गर्ने विषयमा पर्यटक लक्षित अझै हुन सकेको छैन।
एकपटक मेरा एक साथीलाई लिएर लुम्बिनी घुम्न गएका थियौँ। उनले फर्किने बेलामा लुम्बिनीको अध्यात्मिक र मौलिक उपहार के लैजाने? भनेर बजार घुम्नुभयो। तर केही नयाँ चिज पाउन सक्नुभएन। अन्तिममा लुम्बिनीमा रहेको पिपलको रुखबाट खसेका केही पातहरु बटुलेर चिनोको रुपमा लिएर जानुभयो।
नेपालले पर्यटकलाई मौलिक उपहार के दिएर फर्काउन सकिएला? भन्नेतिर सोच्नसके व्यापार व्यवसाय पनि बृद्धि हुने र पर्यटक पनि खुसी हुने थिए।
त्यस्तै, नेपाल भ्रमणमा पर्यटकले अन्य देशको तुलनामा निकै महँगोमा टिकट किन्नुपर्छ। टिकटमा सहुलियत हुनसके नेपाल भ्रमणमा आउने चिनियाँ नागरिकको सङ्ख्या निकै बढ्ने सम्भावना देख्छु।
पछिल्लो समय दुई देशबीच उच्चस्तरीय भ्रमणहरु बाक्लिँदै गएका छन्। यसले कूटनीतिक सम्बन्धमा कस्तो प्रभाव पार्ने देख्नुहुन्छ?
कुनै पनि मुलुकको सम्बन्ध प्रगाढ बनाउन भेटघाट र निरन्तर संवाद हुनु जरुरी छ। यसले एकअर्काको भावनात्मक सम्बन्धलाई अझै बढी मजबुद बनाउन मद्दत गर्छ। कूटनीतिक रुपमा उच्चस्तरीय तहमा सरकार प्रमुखहरु वा राज्य प्रमुखहरुका बीच समयसमयमा भेटघाट हुनु त स्वाभाविक नै छ। त्यसबाहेक नागरिकहरुबीचको सम्बन्ध पनि बाक्लिँदै गएको छ। यसले एकअर्कालाई राम्ररी बुझ्नका लागि मद्दत गर्दछ।
चिनियाँ समाजलाई बुझ्न दुबै देशका विद्यार्थीहरुको आवतजावतले सहयोग गरिरहेको छ। पश्चिमा मुलुकका सञ्चारमाध्यमले चीनका बारेमा जुनप्रकारले व्याख्या गरिरहेका छन्, त्यो बुझाई गलत हो भन्ने कुरामा उनीहरु विश्वस्त हुँदै गएका छन्।
नेपाल–चीनको कूटनीतिक सम्बन्ध विस्तार भएको ७० वर्ष पुग्यो। अब नेपाल र चीनबीको सम्बन्ध कुन दिर्शातर्फ अग्रसर भएजस्तो देख्नुहुन्छ?
नेपाल र चीन कूटनीतिक सम्बन्ध सन् १९५५ अगस्ट १ देखि सुरु भएको हो। विगतदेखि नै यी दुई देशबीच सहअस्तित्व, सहकार्य, सम्मानपूर्ण र मैत्रीपूर्ण सम्बन्ध विस्तार हुँदै आएको छ।
अगस्ट महिनाभरि नेपाल र चीनले कूटनीतिक सम्बन्ध विस्तार गरेको ७० वर्षको उत्सव मनाइरहेका छौँ। आगामी वर्षलाई अझै कसरी स्वर्णिम र प्रगाढ बनाउने विषय महत्वपूर्ण हो।
मेरो विचारमा नेपाल र चीनको सम्बन्ध दीर्घकालीन र परिणाममुखी बनाउन नेपालको राजनीति स्थायी हुन जरुरी हुन्छ। यहाँको विकासले मूर्तरुप लिने हो भने स्थायी नेतृत्व आवश्यक छ।
यहाँको जलविद्युत् परियोजनाहरुमा पनि सहकार्य गर्न सकिन्छ। अबको समय आर्टिफिसियल इन्टेलिजेन्स (एआई) को पनि हो। त्यसैले, डिजिटल साझेदारीमा पनि नेपालले सम्बन्ध अर्थपूर्ण बनाउनसक्ने अर्को आधार देखेको छु।
नेपालले भर्खरै एआई नीति ल्याएको छ, जुन सकारात्मक छ। चीनले यस क्षेत्रमा निकै नै प्रगति हासिल गरिसकेकाले नेपालले पनि चीनबाट प्रविधि सिक्न सक्छ।
नेपाल-चीनको कूटनीतिक सम्बन्ध प्रगाढ बनाउने राजनीतिक, आर्थिक, शैक्षिक, समाजिक, सांस्कृतिकलगायत विभिन्न आधारहरुमध्ये कुन आधार बढी प्रभावकारी देख्नुहुन्छ?
राजनीतिक, आर्थिक, शैक्षिक, सामाजिक तथा सांस्कृतिकलगायत सबै आधारहरुले दुई देशको कूटनीतिक सम्बन्ध बलियो बनाउँछन्। यी सबै बुँदा एकअर्कासँग अन्तर सम्बन्धित छन्।
मेरो विचारमा आर्थिक विकासको साझेदारीले अरु क्षेत्रको समृद्धिमा समेत टेवा पुर्याउन सक्छ। आर्थिक विकास र गरिबी न्यूनीकरणका सन्दर्भमा चीन आफूले जानेको कुराहरु नेपाललाई बाँड्न चाहन्छ।
नेपालमा निकै चासोका साथ चीनको बेल्ड एण्ड रोड (बिआरआई) परियोजनालाई लिने गरिएको छ। यसबारे तपाईंको धारणा के छ?
नेपाल भू-परिवेष्ठित देश भएकाले यहाँ बाह्य कनेक्टीभिटी विस्तार गर्न अति महत्वपूर्ण छ । चीनको बेल्ड एण्ड रोड इनिसिएटिभ (बिआरआई) परियोजनाले वास्तवमा कनेक्टिभिटी विस्तार र यहाँको विकासका लागि सहयोगी बन्न सक्छ।
तर बिआरआईका परियोजनाहरु जुन रुपमा अगाडि बढ्नुपर्ने हो, त्यसरी अघि बढ्न सकेको छैन। त्यसको पछाडि यस क्षेत्रमा बढ्दै गएको भू-राजनीतिक अवस्था पनि एउटा कारण हुन सक्छ। विकासका सन्दर्भमा सबै राजनीतिक दलहरु एक ठाउँमा आउन जरुरी छ।
नेपाल दुई शक्तिशाली छिमेकी देशबीच रहेको तुलनात्मक रुपमा सानो देश हो। यी ठूला राष्ट्रहरुबीचको सन्तुलन कायम गर्न नेपालले के-कस्ता रणनीति अपनाउनुपर्ला?
हो, नेपाल दुई शक्तिशाली देशबीच छ। भौगोलिक हिसाबले नेपाल सानो देश हो। तर, यसको आफ्नै अस्तित्व, सार्वभौमसत्ता र अलग्गै पहिचान छ।
चीन र भारतबीचको छिमेकी सम्बन्ध सन्तुलन कायम गर्न नेपाललाई केही चुनौती भएको हुनसक्छ। मेरो विचारमा नेपालले छिमेकी मुलुकहरुबीच सदाचार र सहकार्यको भावना राखे खासै ठूलो समस्या होइन। सहकार्य गर्नका लागि सन्तुलन कायम गर्नुपर्ने समस्या हो जस्तो लाग्दैन। यस्तो कूटनीतिक अभ्यास नेपालले गर्दै आइरहेको पनि देखिन्छ।
नेपाली विद्यार्थीहरु चीनमा अध्ययन गर्न जानेक्रम बढ्दो छ। ती विद्यार्थीहरुले दुई देशको सम्बन्ध जोड्न कस्तो भूमिका खेल्न सक्छन्?
पछिल्लो समय चीनमा नेपाली विद्यार्थीहरु अध्ययन गर्नेक्रम बढ्दो छ। यो हाम्रा लागि सुखद पक्ष हो। विभिन्न तालिम, सेमिनार र छलफलमा भाग लिने युवा जमात तीब्र छ। विद्यार्थीहरु ज्ञान र संस्कृति आदानप्रदान गर्ने महत्वपूर्ण स्रोत भएकाले शैक्षिक विकासले दुवै देशको सम्बन्ध जोड्न मद्दत गर्छ। एकअर्कालाई बुझ्न पनि यस्तो खालको गतिविधिहरु आवश्यक छ।
अन्तिम प्रश्न, नेपालको कुन पक्ष तपाईंलाई सुन्दर लाग्छ?
नेपाल प्राकृतिक, सांस्कृतिक, धार्मिक हिसाबले सुन्दर छ। अर्को रोचक पक्ष यहाँको बहुआयामिक समाज हो। यहाँको समाजमा खुला रुपमा गरिने वैचारिक बहस, छलफल र अन्तक्रियात्मक संस्कृति मलाई राम्रो लाग्छ।
